Italiyaning “Roma” klubi 28 yoshli kot-d’Ivuarlik yarim himoyachi Frank Kessieni o‘z tarkibga qo‘shib olishni istamoqda. Bu haqda taniqli insayder Janluka Di Marsio xabar berdi.
Hozirda transfer haqida boshqa ma’lumotlar oshkor qilinmagan. Biroq “Roma”ning yangi ustozi Jan Pyero Gasperini futbolchini o‘z jamoasida ko‘rmoqchi ekanligi va u orqali yarim himoya chizig‘idagi muammoni bartaraf etishni istayotgani haqida xabarlar tarqaldi.
Ayni payt Kessie Saudiya Arabistoni chempionatining “Al-Ahli” jamoasi safida to‘p surmoqda. Futbolchining jiddaliklar bilan shartnomasi 2026-yil iyun oyiga qadar amal qiladi.
Frank uchun A Seriya begona emas. Chunki u Saudiya Arabistoniga yo‘l olguniga qadar “Milan” sharafini himoya qilgan. Shuningdek, Kessie biroz vaqt Kataloniyaning “Barselona” klubida ham o‘ynagan.
Ma’lumot uchun, o‘tgan mavsum Frank Kessie “Al-Ahli” safida 44 ta o‘yinda maydonga tushib, o‘z hisobiga 4 ta gol va 5 ta golli uzatma yozdirib qo‘ygan. Transfermarkt portali futbolchining qiymatini 14 million yevroga baholamoqda.
