Rossiya prezidenti Vladimir Putin Ukraina bilan to‘g‘ridan-to‘g‘ri muzokaralarni, hech qanday oldindan shartlarsiz, 2022-yilda to‘xtatilgan joyda — Istanbulda, shu yilning 15-may kuni qayta boshlashni taklif qilmoqda. Bu haqda u 11-mayga o‘tar kechasi jurnalistlar bilan suhbatda aytib o‘tdi.
“Biz muzokaralarni cho‘zmasdan, avvalgi o‘tkazilgan joy — Istanbulda, 15-may kuni boshlashni taklif qilamiz”, degan Putin.
Rossiya yetakchisining so‘zlariga ko‘ra, ertaga Turkiya prezidenti Rajab Toyyib Erdo‘g‘on bilan telefon orqali suhbat rejalashtirilgan bo‘lib, bu suhbat davomida u muzokaralarni o‘tkazish imkoniyati masalasini muhokama qiladi.
Shu bilan birga, Vladimir Putin Moskva hech qanday old shartlarsiz muzokaralarga tayyor ekanini ta’kidlagan.
“Biz Ukraina bilan jiddiy muzokaralarga tayyormiz. Muzokaralarning asosiy maqsadi — mojaroni keltirib chiqargan asosiy sabablarni bartaraf etish va uzoq muddatli, barqaror tinchlikka erishishdir”, dedi u.
Putinning aytishicha, bo‘lajak muzokaralarda yangi va haqiqiy o‘t ochishni to‘xtatish bo‘yicha kelishuvga erishish ehtimoli ham mavjud.
“Bu muzokaralar davomida yangi o‘t ochishni to‘xtatish bo‘yicha kelishuvga, ya’ni haqiqiy sulh bo‘yicha kelishib olish mumkinligini istisno qilmaymiz. Endi qaror Kiyev tomonda”, deya qo‘shimcha qilgan Rossiya rahbari.
