Hindistondan yetti yil avval qochib ketgan milliarder Mehul Choksi Belgiyada ushlandi. U Panjob Milliy bankidan 1,6 milliard dollardan ortiq mablag‘ni firibgarlik yo‘li bilan o‘zlashtirishda gumon qilinmoqda. Bu haqda NDTV telekanali xabar berdi.
Mehul Choksi va uning jiyani Nirav Modi Panjob Milliy banki xodimlari bilan til biriktirib, bank aktivlaridan mazkur summani o‘zlashtirganlikda ayblanib, Hindiston Markaziy tergov byurosi tomonidan qidiruvga berilgan edi. Hindiston tarixidagi bu eng yirik firibgarlik 2017-yil oxirida fosh etilgan. Shundan so‘ng 2018-yil yanvarida Choksi yaqin qarindoshlari bilan Hindistondan qochib ketgan. Uning qayerdaligi noma’lum bo‘lib, Interpol tomonidan qidiruv e’lon qilingan edi.
Belgiya Adliya vazirligi dushanba kuni NDTV telekanaliga tasdiqlashicha, qochoq hindistonlik tadbirkor Choksi 12-aprelda hibsga olingan.
“U keyingi sud jarayonini kutish uchun ushlab turilmoqda. Unga advokatning kirishi ta’minlangan”, deya Belgiya tomonining bayonotidan iqtibos keltiradi telekanal.
Hindiston Belgiyadan gumonlanuvchini ekstraditsiya qilishni so‘ragan. Adliya vaziri Arjun Ram Megxvalning ta’kidlashicha, Belgiyada Hindiston odil sudlovidan yashiringan Choksining hibsga olinishi Hindiston bosh vaziri Narendra Modi hukumati davridagi hind diplomatiyasining g‘alabasi hisoblanadi.
