28-mart kuni Myanma va qo‘shni Tailandda 7,7 va 6,4 magnitudali ikkita kuchli zilzila yuz berdi. Zilzila yirik shaharlarda, jumladan, favqulodda holat rejimi joriy etilgan va aeroportlar faoliyati to‘xtatilgan Bangkokda ham sezilgan. Tailand poytaxtida qurilayotgan 30 qavatli osmono‘par bino qulab tushib, 43 kishi vayronalar ostida qoldi.
Myanmada zilzila oqibatlari yanada halokatli bo‘ldi. Mandalay va Sikayn shaharlari orasidagi Iravadi daryosi ustidagi ko‘prik qulab tushdi, tarixiy binolar, jumladan, Chauktoji pagodasi va XIX asrga oid Mandalay saroyi devorlari shikastlandi.
Mahalliy aholining aytishicha, ko‘plab uylar butunlay vayron bo‘lgan, odamlar takroriy silkinishlar xavfidan qo‘rqib, binolarga qaytishga botina olmayapti.
So‘nggi ma’lumotlarga ko‘ra, Myanmadagi zilzila oqibatida 144 kishi halok bo‘lgan, qurbonlar soni yana ortishi mumkin. Bu haqda mamlakat davlat ma’muriy kengashi raisi, bosh vazir va katta general Min Aun Xlayn ma’lum qilgan.
“Jami 144 kishi halok bo‘ldi. Neypido munitsipal tumanida 432 kishi jarohatlangan. Bizga ma’lum bo‘lishicha, Sagaing va Kyauksda 300 kishi hamon bedarak yo‘qolgan deb hisoblanmoqda. Jami 732 kishi jarohat olgan. O‘lim va jarohatlanganlar soni ortishi kutilmoqda. Ba’zi joylarda binolar qulab tushganligi sababli, biz hali ham bu binolarda qutqaruv ishlarini olib bormoqdamiz”, dedi davlat rahbari xalqqa qilgan rasmiy murojaatida.
Seysmologlar yaqin soatlar ichida kuchli zilziladan keyin yuz berishi mumkin bo‘lgan takroriy zilzilalar haqida ogohlantirmoqda va yuqori qavatli binolarda bo‘lishdan saqlanishni maslahat bermoqda.
