Amerikaning Minnesota shtatida yashovchi ikki yashar meyn-kun zotli mushuk dunyodagi eng uzun dum egasi deb tan olindi. Bu haqda Ginnesning rekordlar kitobi saytida xabar berildi.
Mutaxassislar qayd etganidek, janob Pagsli Addams laqabli uy hayvoni deyarli yarim metr — 46,99 santimetr uzunlikdagi dumga ega. Mushukka filmdagi Addamslar oilasi qahramonining nomi berilgan. Pagsli Kemeronlarning sevimli a’zosi, ularning uyida jami uch nafar meyn-kun mushuklari boqiladi.
Pagslining egasi Amanda xonim so‘zlariga ko‘ra, mushuk yosh bo‘lishiga qaramay, veterinarga birinchi tashrifidan boshlab o‘z shtatida juda mashhur bo‘lib ketgan.
“Men uni birinchi marta veterinarga olib borganimda mutaxassis mushugimning bunday fiziologik tuzilishi kamyob holat ekanligini qayd etgan edi. O‘sha kundan boshlab to‘rt oyoqli do‘stimizning o‘ziga xos ekanligi xayolimdan ketmay qo‘ydi. So‘ng men bu haqda farzandlarimga so‘zlab berdim va, albatta, ular bunday holat Ginnesning rekordlar kitobiga kiritilganmi yoki yo‘qligini aniqlashga tushdi. Ne ko‘z bilan qarasak, dunyodagi eng uzun dum bo‘yicha rekord o‘rnatilgan ekan”, deydi Amanda.
Hozirda Pagsli ikki yoshdan oshgan va uning dumi ham o‘sishda davom etmoqda. Amanda mushukni “juda sho‘x” uy hayvoni deb ta’riflaydi, biroq Pagsli o‘zgalar oldida o‘zini ancha xotirjam tutadi va “O‘tir” buyrug‘ini bajara oladi. Mushukning kundalik tartibi oddiy: u ovqatlanadi, uxlaydi va egalariga erkalik qiladi.
Biroq ba’zida Pagslining uzun dumi unga harakatlanishga biroz xalaqit qilishi mumkin.
