Isroil mudofaa kuchlari G‘azo sektori janubida HAMAS harakatining harbiy razvedka boshlig‘i Usama Tabashni o‘ldirdi.
Bu haqda Isroil armiyasi matbuot xizmati xabar berdi.
“Isroil armiyasi G‘azo janubidagi HAMAS harbiy razvedkasi boshlig‘i hamda HAMASning kuzatuv va o‘t ochish bo‘limi rahbari bo‘lgan Usama Tabashni yo‘q qildi”, deyiladi bayonotda.
Tabash yuqori martabali HAMAS vakili hisoblanib, tashkilot uchun muhim operativ bilim manbayi bo‘lgan. U HAMASda turli rahbarlik lavozimlarida, jumladan, Xon Yunus brigadasida batalyon qo‘mondoni sifatida ham ishlagan, deya qo‘shimcha qildi matbuot xizmati.
Armiya taʼkidlashicha, Tabashning yo‘q qilinishi “HAMASning razvedka maʼlumotlarini yig‘ish va qo‘shinlarga zarar yetkazish qobiliyatini pasaytiradi”.
