Istanbul shahri meri, muxolifatdagi Respublika xalq partiyasi vakili Akrom Imomo‘g‘li qo‘lga olindi va politsiya hamrohligida sudga yetkazildi. Bu haqda CNN Türk xabar berdi.
Imomo‘g‘liga nisbatan tergov doirasida 100 kishini, jumladan, merning matbuot bilan aloqalar bo‘yicha maslahatchisi Murat Ongunni hibsga olishga order berilgan. Imomo‘g‘lining Sariyer tumanidagi qarorgohida tintuv o‘tkazilmoqda. Mer 8-mart kuni prezidentlik uchun rasman kurashga kirishgan edi.
NTV nashriga ko‘ra, Istanbul prokuraturasi shahar meri va uning ma’muriyati xodimlarini korrupsiya hamda terrorchilar bilan hamkorlik qilganlikda ayblagan.
O‘z navbatida, Istanbul universiteti shahar merining diplomini bekor qilgan. Imomo‘g‘li universitetning harakatini “noqonuniy” deb baholagan.
Ular (universitet) bunday qaror qabul qilish vakolatiga ega emas. Vakolat faqat Biznes boshqaruvi fakulteti direktorlar kengashiga tegishli. Bu qarorni qabul qilganlar tarix va adolat oldida javob beradigan kunlar yaqin. Adolatga, qonun va demokratiyaga tashna xalqimizning marshini to‘xtatib bo‘lmaydi, dedi mer.
Universitet 38 nafar shaxs, shu jumladan Istanbulning meri, 1990-yilda boshqaruv fakultetining ingliz tilidagi dasturiga g‘ayriqonuniy tarzda o‘tgani haqida ma’lum qildi.
Imomo‘g‘lining Respublika xalq partiyasidan deputat Murat Amirning aytishicha, bu qaror “demokratiyaga qattiq zarba” hisoblanadi.
Imomo‘g‘li 2027-yilda bo‘lib o‘tishi mumkin bo‘lgan muddatidan oldin prezidentlik saylovlarida Erdo‘g‘onning asosiy raqibi hisoblanar edi. Turkiyada davlat rahbari lavozimi uchun kurashda faqat oliy ma’lumotli nomzodlar ishtirok etishi mumkin.
