Rossiya Ukrainadagi harbiy harakatlarni to‘xtatishga tayyor, ammo bu faqat uzoq muddatli mustahkam tinchlikka olib kelishi shart. Bu haqda 13-mart kuni Rossiya prezidenti Vladimir Putin Belarus prezidenti Aleksandr Lukashenko bilan o‘tkazilgan qo‘shma matbuot anjumanida ma’lum qildi.
Biz jangovar harakatlarni to‘xtatish bo‘yicha takliflarga rozimiz, ammo bu to‘xtatish uzoq muddatli tinchlikka olib keladigan va ushbu inqirozning asl sabablarini bartaraf etadigan bo‘lishi kerak, dedi Putin.
Ukrainaning jangovar harakatlarni to‘xtatishga tayyorligini sharhlagan Putin shunday dedi: “Bilasizmi, Saudiya Arabistonidagi Amerika—Ukraina uchrashuvi bu tashqi ko‘rinishdan Ukraina tomonining Amerika bosimi ostida qaror qabul qilganiga o‘xshashi mumkin. Aslida, ishonchim komilki, Ukraina tomoni hozirgina aytib o‘tilganidek, joylardagi vaziyatdan kelib chiqib, amerikaliklardan buni qat’iy ravishda so‘rashi kerak edi”.
“G‘oyaning o‘zi (yarashish haqida) to‘g‘ri. Va biz, albatta, uni qo‘llab-quvvatlaymiz, lekin muhokama qilishimiz kerak bo‘lgan masalalar bor”, deydi Putin.
Shuningdek, u bir qator aniq savollarni ko‘tardi, xususan, Kursk viloyatidagi Ukraina qurolli kuchlarining mag‘lub bo‘lmagan bo‘linmalari bilan nima qilish kerakligi haqida:
“Biz tinch aholiga qarshi shuncha jinoyatlardan so‘ng qurolli kuchlarni Kursk viloyatidan chiqarib yuborishimiz kerakmi? U yerda Kursk viloyatidagi UQK uchun ikki yo‘l bor: asirga tushish yoki halok bo‘lish”.
Putinning ta’kidlashicha, Rossiya 30 kunlik sulh davrida “Ukraina safarbarlik o‘tkazmasligi, askarlarni tayyorlamasligi va qurol olmasligi” haqida kafolat olishi kerak.
“O‘ylaymanki, biz amerikalik hamkasblarimiz, hamkorlarimiz bilan bu borada gaplashishimiz, balki prezident Tramp bilan qo‘ng‘iroqlashib, u bilan birgalikda muhokama qilishimiz kerak. Ammo biz bu mojaroni tinch yo‘l bilan tugatish g‘oyasini qo‘llab-quvvatlaymiz”, deb ta’kidladi u.
Rossiya rahbari jahon yetakchilarining Ukrainadagi harbiy harakatlarni to‘xtatishga yordam berishga intilishini oliyjanob vazifa deb atagan.
Prezident so‘zining yakunida mojaroni tinch yo‘l bilan to‘xtatish g‘oyasining o‘zi to‘g‘ri ekanligini, biroq u prezident Tramp bilan muhokama qilishi kerak bo‘lgan ko‘plab masalalar borligini ta’kidladi.
“Nazorat, tekshirish masalalari qanday hal qilinadi? 2 ming kilometr masofada kim nimani buzganini kim aniqlaydi? O‘t ochishni to‘xtatish buyrug‘ini kim beradi? Sog‘lom fikr nuqtayi nazaridan bu hammaga tushunarli, bu jiddiy masalalar. Bularning barchasi har ikki tomondan sinchkovlik bilan o‘rganishni talab qiladigan masalalardir”.
