G‘azo sektorida kamida uch nafar bola sovuq qotishdan vafot etdi. Bu haqda Falastin sog‘liqni saqlash sohasidagi manbalarga tayanib, WAFA axborot agentligi xabar berdi.
Hozirda G‘azoda sovuq qotish oqibatida vafot etgan bolalar soni 10 nafarga yetdi. O‘t ochishni to‘xtatish kelishuviga qaramay, Isroil hamon sektorga gumanitar yordam kirishini cheklayotgani aytilmoqda. Bu esa boshpana va issiqlik ta’minoti bilan bog‘liq muammolarni keltirib chiqarib, G‘azo aholisining ahvolini yanada og‘irlashtirmoqda.
Manbalarga ko‘ra, kuchli sovuq fonida G‘azo sektoridagi ko‘plab bolalar “og‘ir ahvolda”. Isroil armiyasining G‘azo sektorida 15 oydan ortiq davom etgan hujumlari oqibatida 61 mingdan ortiq falastinlik halok bo‘ldi. G‘azoda ko‘chirilganlar soni 2 million kishiga yetdi.
HAMAS va Isroil o‘rtasidagi o‘t ochishni to‘xtatish kelishuvi 600 mingdan ortiq falastinliklarga o‘zlarining shahar va qishloqlariga qaytish imkonini berdi. Ular qaytgach, yashash uchun yaroqsiz hududlardan boshqa hech narsa topmadi. G‘azodagilar o‘t ochishni to‘xtatish kelishuvi doirasida ko‘chma uylar va boshpanalarga muhtoj.
Biroq Isroil hozirgacha G‘azo sektoriga yetarli miqdorda ko‘chma boshpana va chodirlar kiritilishiga ruxsat bermagan. Oilalar bir yarim yildan ko‘proq vaqt davomida qo‘lbola chodirlardan foydalanib kelgan va endi ochiq joylarda yashamoqda.
