Xakerlar eng yirik kriptovalyuta birjalaridan biri bo‘lgan Bybit birjasini buzib kirdi va 1,46 milliard dollar pulni yechib oldi. Bu haqida Bloomberg xabar berdi.
Bybit jamoasi buzg‘unchilikni tasdiqladi va hujumchilar Ethereum “sovuq hamyonlari”dan biriga (oflayn) kirish huquqini qo‘lga kiritganligini ma’lum qilishdi. Ular soxta foydalanuvchi interfeysidan foydalanganlar va smart-shartnoma tartibini o‘zgartirganlar.
Buning yordamida xakerlar soxta tranzaksiya uchun imzo qo‘lga kiritishga va pul mablag‘larini o‘z manzillariga o‘tkazishga muvaffaq bo‘lishdi. Dasturchilarning so‘ziga ko‘ra, platformaning qolgan hamyonlariga hech qanday xavf tahdid solmayapti.
“Biz o‘z foydalanuvchilarimiz va hamkorlarimizni Bybit birjasidagi qolgan “sovuq hamyonlar” butunlay xavfsiz holda ekaniga ishontirmoqchimiz. Mijozlarning barcha mablag‘lari xavfsiz va bizning operatsiyalarimiz odatdagidek uzilishlarsiz davom etmoqda”, deyiladi kompaniya bayonotida.
Zararli dasturni yaratgan va kriptobirjaga hujun uyushtirganlar Shimoliy Koreya xakerlari, xususan, Lazarus guruhi ekani taxmin qilinmoqda.
