“Manchester Siti” himoyachisi Yoshko Gvardiol jamoaning yangi aʼzosi, O‘zbekiston terma jamoasi a’zosi Abduqodir Husanovning “Chelsi”ga qarshi debyuti haqida fikrini bildirib, unga yordam berishga tayyorligini maʼlum qildi.
“U yaxshi yigitga o‘xshaydi. O‘tgan o‘yinda yaxshi o‘ynadi. Premyer Ligada «Chelsi”ga qarshi o‘yinda debyut qilish oson emas. U hali yosh, biz unga har qanday yordamga tayyormiz. Abduqodir men yoki tajribali o‘yinchilarga bemalol suyanishi mumkin, uni qo‘llab-quvvatlaymiz, yordam beramiz”, deydi xorvatiyalik futbolchi.
Ma’lumot uchun, APL 23-tur doirasida “shaharliklar” “Chelsi”ga qarshi maydonga tushib, 3:1 hisobida g‘alaba qozondi. Asosiy tarkibda maydonga tushgan Husanov APLda o‘ynagan ilk o‘zbekistonlikka aylandi.
Bugun, 29-yanvar kuni Gvardiola shogirdlari Chempionlar Ligasi umumiy bosqichining so‘nggi turida “Bryugge”ga qarshi maydonga tushadi. Ushbu uchrashuvda “shaharliklar”ni faqat g‘alaba qanoatlantiradi. Boshqa har qanday natija APL klubini musobaqa bilan xayrlashishiga olib keladi.
