Frontier Airlines sobiq UFC chempioni Habib Nurmagomedovning reysdan tushirilishi bo‘yicha rasmiy bayonot berdi.
“2025-yil 11-yanvar kuni Las-Vegasdan San-Fransiskoga yo‘l olgan 4401-reysi parvozni boshlashga tayyorlanayotgan edi. O‘sha vaqtda ekipaj a’zosi chiqish eshiklari yonida o‘tirgan yo‘lovchilarga xavfsizlik bo‘yicha instruktsiyalarni o‘qishni boshladi. Chiqish eshigi yonida o‘tirgan Habib Nurmagomedovga favqulodda vaziyatda yordam bera olishga tayyorligi haqida bir necha savol berildi. Bort kuzatuvchining so‘zlariga ko‘ra, Nurmagomedov bu savollar bir necha marta murojaat qilinishiga qaramay, javob bermagan. Shundan so‘ng unga boshqa qulayroq joyga o‘tkazilishi yoki samolyotni tark etishi lozimligi aytilgan.
Ijtimoiy tarmoqlarda tarqalgan videolarda ushbu muloqot aks etmagan, balki joyni almashtirish bo‘yicha so‘rovni takrorlaganidan keyingi vaziyat ko‘rsatilgan. Yo‘lovchining dastlabki harakatsizligi va joyni o‘zgartirishni rad etishi sababli uni samolyotni tark etishga chaqirish aviakompaniya qoidalariga muvofiq amalga oshirilgan. Ushbu qaror uning etnik kelib chiqishi bilan hech qanday aloqador emas. Biz Nurmagomedov va uning hamrohlari uchun chiptalar to‘lovini to‘liq qaytardik”, deyiladi Home of Fight ijtimoiy tarmoq sahifasida chop etilgan bayonotda.
Avvalroq Habib Nurmagomedov bort kuzatuvchisi unga qo‘pol muomala qilgani, xotirjamlikni saqlashga harakat qilib samolyotni tark etgani xabar berilgandi.
Izoh (0)