Gruziya poytaxti Tbilisida 12-yanvar kuni namoyishchilar korporativ ziyofatga kelgan sudyalarga tuxum uloqtirdi. Bu haqda Exo Kavkaza xabar berdi.
Namoyishchilar sudyalar korpusi vakillari uchun tantanali kecha o‘tkazilayotgan restoran oldida to‘plangan. Ular sudyalarni yoqimsiz shiorlar bilan qarshi olgan. Bir necha sudya restorandan chiqqanidan so‘ng, namoyishchilar ularga tuxum uloqtirishi ortidan mojaro boshlangan.
Ta’kidlanishicha, og‘zaki tortishuvdan so‘ng huquq-tartibot idoralari xodimlari bilan to‘qnashuvlar boshlangan. Buning oqibatida politsiya xodimlari bir necha kishini hibsga olgan.
Namoyish sababi
Fuqarolarning noroziligi Tbilisi shahar sudining qarorlari bilan bog‘liq. Qaror bo‘yicha, Yevropa integratsiyasini qo‘llab-quvvatlab namoyishga chiqqan va jinoyat moddalariga ko‘ra qo‘lga olingan shaxslar hibsda qoldirilmoqda. Qo‘lga olinganlarning ota-onalari ham sudyalarga qarshi norozilik bildirgan.
Parallel ravishda aksiya Batumida kechqurun bo‘lib o‘tdi, u yerda hibsga olishlar 11-yanvarda boshlanib, 12-yanvar kuni davom etgan. Qo‘lga olinganlar orasida muxolifatdagi “Droa” partiyasi yetakchisi Elene Xoshtariya hamda “Batumelebi” va “Netgazeti” internet nashrlari asoschisi Mziya Amaglobeli bor.
