Hindistonning Chxattisgarx shtatida bomba portlashi oqibatida kamida sakkiz nafar politsiyachi halok bo‘ldi. Bu haqda DW nashri xabar bermoqda.
Hindiston politsiyasi portlash oqibatida sakkiz nafar xodim va haydovchi halok bo‘lganini ma’lum qildi.
Hujum uchun javobgarlikni hech bir qurolli guruh o‘z zimmasiga olmadi, biroq xavfsizlik kuchlari mintaqadagi eng faol maoist isyonchilarini asosiy gumondor sifatida ko‘rmoqda.
Portlash xavfsizlik kuchlarini nishonga olgan qator hujumlarning bir qismi bo‘lib, politsiya va maoist isyonchilar o‘rtasidagi muntazam to‘qnashuvlar fonida sodir bo‘ldi.
Chxattisgarx va unga qo‘shni Hindistonning markaziy va sharqiy shtatlari hukumat va radikal maoist guruhlar o‘rtasida o‘nlab yillar davom etgan qurolli to‘qnashuvlardan aziyat chekmoqda.
So‘nggi yillarda harbiylashtirilgan guruhlarning faoliyati sezilarli darajada kamayganini ham ta’kidlash zarur.
