O‘zbekistondagi mobil aloqa kompaniyalari orasida o‘z o‘rniga ega bo‘lgan Ucell kompaniyasining bir ajoyib anʼanasi bor: har yili Yangi yil oldidan jurnalistlarni to‘plab, ular bilan ochiq muloqot o‘tkazadi va qiziqarli savol-javoblar orqali o‘z ishini tahlil qiladi. Bu suhbatlarda nafaqat kompaniyaning rejalari xususida so‘z boradi, balki muhokamalar davomida ko‘plab muammolarga yechim topiladi.
O‘tgan yilgi uchrashuvda Qashqadaryo viloyati Dehqonobod tumanining tog‘li Oqrabot qishlog‘ida internet va aloqa sifati yomonligidan shikoyat qilingan edi. Hududda birgina Uzmobile bazaviy stansiyasi bor, u ham yuqori yuklanish tufayli doimiy ravishda ishlamasdi. Bunda nafaqat internet, balki oddiy telefon aloqasi ham qattiq qiyinchilik tug‘dirardi.
Ucell rahbariyati muammoni eshitgach, masalani hal qilish uchun vaʼda berdi — “balki, kelasi Yangi yilga sovg‘a bo‘lar”.
Vaʼda bajarildi
Kuz faslida kompaniya qishloqqa antenna o‘rnatdi. Endi ushbu hududda internet va telefon aloqasi muammosi bartaraf etildi. Odamlar qo‘ng‘iroq qilish yoki internetdan foydalanish uchun tepalikka chiqib yugurishdan xalos bo‘ldi.
Qishloq aholisi o‘ziga yangi imkoniyatlarni ochgan ushbu ishdan mamnun. Internet faqatgina aloqa uchun emas, balki taʼlim va ishlab chiqarish uchun ham katta yordam bermoqda.
“Bu — qishlog‘imiz aholisining hozirgi texnologiyalar davrida zamon bilan hamnafas yashashi uchun yaratilgan yana bir imkoniyat. Yuqori tezlikda ishlovchi internet, ayniqsa, o‘quvchilar va yoshlar uchun juda zarur edi. Bu orqali zamonaviy kasblar va xorijiy tillarni onlayn darslar orqali o‘rganish imkoniga ega bo‘lishdi”, deb yozdi qishloq faollaridan biri Jasur Nazarov, o‘zining Facebook’dagi sahifasida.
Izoh (0)