Istanbulda bo‘lib o‘tgan Yevropa Ligasi o‘yini oldidan “Manchester Yunayted” muxlislari “Fenerbahche” muxlislari tomonidan hujumga uchradi.
Qayd etilishicha, turk klubining 50 ga yaqin muxlisi o‘yinga kelgan “Yunayted” muxlislari guruhiga hujum qilgan.
Ijtimoiy tarmoqlarda joylashtirilgan kadrlarda hujum Grand Hisar mehmonxonasi yaqinida sodir bo‘lganini ko‘rish mumkin. Natijada bir necha kishi jarohatlangan.
“X” ijtimoiy tarmog‘ida Bogaz Bezorilari bu kadrlar bilan maqtanib “Bu ISTANBUL!” deya izoh qoldirgan.
Hujumga uchragan “qizil iblislar” muxlisi StrettyNews’ga besh kishilik guruhga g‘azablangan olomon hujum qilganini aytib berdi.
“Bizni 50 ga yaqin odam qurshab oldi. Bir yigit ko‘chada orqamdan yurib, o‘zini yordam bermoqchi bo‘lgandek ko‘rsatdi va jag‘imga musht tushirdi”, deydi Angliya klubi muxlisi.
Mehmonlarning ikki muxlisi shisha va lom bilan urilishi oqibatida jarohat olgan.
Ma’lumot uchun, ushbu uchrashuv 1:1 hisobidagi durang bilan yakunlandi.
