Kolumbiyaning Medelin shahrida italiyalik Gustavo Nochella (Germes) qo‘lga olindi. Politsiya uni Italiya mafiyasining yana bir “cho‘qintirgan otasi“ va dunyodagi eng ko‘p qidiruvda bo‘lgan narkobaronlardan biri deb ataydi. Bu haqda Semana xabar berdi.
58 yoshli Germesni bilyard o‘yiniga bo‘lgan ishtiyoqi tufayli qo‘lga olishga muvaffaq bo‘lishdi. Kolumbiya politsiyasi italiyalik hamkasblari, Yevropol va Britaniya bilan hamkorlikda narkobaronni hibsga olish operatsiyasini o‘tkazdi.
Kolumbiya politsiya boshlig‘i Uilyam Rene Salamanka jinoyatchini bilyard stoli fosh etgani haqida maʼlum qildi. Jumladan, Germes har uch oyda kvartirasini almashtirgan, ammo har bir yangi uyiga bilyard stoli buyurtma qilgan.
Taʼkidlanishicha, Germes “Rinaldi-Formikola, Amato-Pagano va De Mikko klanlari hamda Janubiy Amerika mafiyasi o‘rtasidagi bog‘lovchi bo‘g‘in“ hisoblanadi. U giyohvand moddalarning yirik partiyalari savdosi bilan shug‘ullangani aytilmoqda. Operatsiyaga tayyorgarlik yarim yil davomida olib borildi.
