“Real”ning sobiq bosh murabbiyi Zinedin Zidan “Manchester Yunayted”ni boshqarishi mumkin.
The Independent xabariga ko‘ra, Ineos (“Manchester Yunayted” klubining xo‘jayinlaridan biri) ning sport sektori bosh direktori Jan-Klod Blan fransiyalik mutaxassis Zinedin Zidan bilan doimiy aloqada.
Qayd etilishicha, Blan ham “Manchester Yunayted” klubi xo‘jayini Jim Retkliff kabi “Real”ning sobiq ustoziga anchadan beri muxlislik qilib kelgan.
51 yoshli fransiyalik mutaxassis 2021-yilning yozidan beri ishsiz qolmoqda. “Real Madrid” klubini tark etgach, murabbiy boshqa klublar taklifini ko‘rib chiqmadi.
Avvalroq mutaxassis Fransiya termasini boshqarishini xohlayotganini ma’lum qilgandi.
Eslatib o‘tamiz, Zinedin Zidan “Real”ni 2016—2018 va 2019—2021 yillar davomida boshqargan. Fransiyalik murabbiy “qirollik klubi” bilan birgalikda ikki karra Ispaniya chempioni, ikki karra Ispaniya Superkubogi va uch karra Chempionlar ligasi g‘olibi bo‘lgan.
