Rossiyaning “Rosatom” davlat korporatsiyasi tomonidan O‘zbekistonda atom elektr stansiyasini qurish loyihasi qayta shakllandi. Endi ham kichik, ham katta AES qurilishi rejalashtirilmoqda. Bu haqda Rossiya Federatsiyasi Iqtisodiy rivojlanish vazirligi Toshkent xalqaro investitsiya forumi doirasida o‘tkazilgan Rossiya va O‘zbekiston o‘rtasidagi tovar aylanmasini oshirish bo‘yicha ishchi guruh yig‘ilishi yakunida ma’lum qildi, deya xabar bermoqda “Interfax” nashri.
Ma’lum qilinishicha, tadbirda Rossiya Federatsiyasi iqtisodiy rivojlanish vaziri Maksim Reshetnikov hamda O‘zbekiston Respublikasi investitsiyalar, sanoat va savdo vaziri Laziz Qudratov ishtirok etgan.
“O‘tgan yili kichik quvvatli atom stansiyasi qurilishiga start berilgan edi. Bu yil esa davlat rahbarlari loyihani qayta shakllantirib, katta quvvatli ikki blokli stansiya va kichik quvvatli ikki blokli stansiya qurishga kelishib oldi”, deyiladi vazirlik xabarida.
Aprel oyi oxirida “Rosatom” rahbari Aleksey Lixachev jurnalistlarga davlat korporatsiyasi bir yil ichida yoki undan oldinroq O‘zbekistondagi kichik AES poydevorini quyishni rejalashtirganini ma’lum qilgan. O‘shanda Lixachev mamlakatda yirik AES qurish imkoniyati haqidagi savolga javob berar ekan, mamlakat rahbariyati bunday qaror qabul qilgan taqdirda, “Rosatom”da “nafaqat bu kelajak inshootlarning ko‘rinishi, balki moliyaviy sxemasi va maksimal mahalliylashtirish bilan bog‘liq tashkiliy masalalar bo‘yicha ham takliflar tayyor bo‘lishini” ta’kidlagan.
Ta’kidlanishicha, O‘zbekistonda kichik AES qurish loyihasi “Rosatom”ning xorijdagi ilk shunday eksport loyihasi hisoblanadi. Tomonlar bu borada o‘tgan yil bahorda kelishib olishgan, kuzda esa loyihalash ishlari va hujjatlarni ishlab chiqishni nazarda tutuvchi protokol imzolangan.
Loyihada har birining quvvati 55 MVt bo‘lgan oltita reaktor qurilishi ko‘zda tutilgan. Qurilish ishlari joriy yil yozida boshlanishi, AES esa 2029—2033-yillarda bosqichma-bosqich ishga tushirilishi rejalashtirilgan.
Shu bilan birga, loyihani O‘zbekiston tomoni moliyalashtirishi mo‘ljallangan, Rossiya krediti masalasi muhokama qilinmagan.
O‘zbekiston kichik quvvatli AES qurilishi uchun hudud tasdiqlangani xabar qilingandi.
Izoh (0)