Rossiya davlat atom energetika kompaniyasi Rosatom Turkiya janubida qurilayotgan Akkuyu AES ishchilariga maoshlar o‘z vaqtida to‘lanmayotganini tashqi siyosiy omillar bilan izohladi.
Kompaniya matbuot xizmati loyiha uchun ajratilgan mablag‘larning katta qismini uchinchi tomon bloklaganini bildirdi. Ammo gap aynan qaysi o‘yinchi haqida ketayotgani aytilmadi.
“Biz hammamiz rivojlangan rus yadro loyihalarini izdan chiqarishga urinayotgan dushman mamlakatlarning shubhali usullari tuzog‘iga tushyapmiz”, deyiladi kompaniya xabarida.
Kompaniya Akkuyu AESni qurishda mehnat qilayotgan xodimlar bir necha oydan beri maosh berilmayotganidan norozi bo‘lib, ish tashlash o‘tkazganidan so‘ng masalaga izoh berishga majbur bo‘ldi. Tarmoqlarda tarqalgan videolarda ishchilarning qurilish texnikalarini to‘sib qo‘ygani va janjalli holatlar aks etgan.
Rosatom muammolarni muhokama qilish uchun pudratchilar bilan uchrashuv o‘tkazilishini ma’lum qildi. Mahalliy sho‘ba korxona Akkuyu Nuclear esa ishchilar bilan muzokaralar davom etayotganini tasdiqladi.
Turklarning dastlabki atom elektr stansiyasi
Akkuyu AES Turkiyada qurilayotgan ilk atom elektr stansiyasi bo‘lib, unda Rossiyaning VVER-1200 reaktorlaridan to‘rtta o‘rnatiladi. Loyiha ishga tushgach, u mamlakatda elektr energiyasiga bo‘lgan ehtiyojning 10 foizini ta’minlashi aytiladi. Rosatom asosiy investor sifatida jalb qilingan. Geosiyosiy tanglik va Rossiyaga nisbatan kiritilgan sanksiyalarga qaramay, loyiha davom etmoqda.
Izoh (0)