Xitoyda so‘nggi haftalarda korrupsiyaga qarshi kurash doirasida yirik brokerlik firmalarining kamida uch nafar rahbari hibsga olindi. Bloomberg axborot manbalariga tayanib xabar berishicha, qo‘lga olinganlar orasida chet elga chiqishga muvaffaq bo‘lgan, biroq ikki hafta oldin u yerda ushlanib, Xitoyga olib ketilgan Haitong Securities bosh direktori o‘rinbosari Jiang Chengjun ham bor.
So'nggi oylarda Jiang Haitong Securities kompaniyasining yirik raqibi Guotai Junan Securities bilan birlashishiga tayyorgarlikni nazorat qildi, deb xabar beradi Bloomberg. Agentlik manbalarining aytishicha, Xitoydagi turli brokerlik kompaniyalarining boshqa ko‘plab yuqori lavozimli xodimlarining pasportlari musodara qilingan va endi xorijga biznes yoki hatto shaxsiy maqsadlarda sayohat qilish uchun rahbariyatdan ruxsat olishlari kerak.
Xorijiy sayohatlarga faqat boshqa xodim hamrohligida borish mumkin va agar ishbilarmon sayohatchilar rahbariyat bilan oldindan kelishilmagan ish bilan shug‘ullanayotgan bo‘lsa, bunday safarlarga ruxsat berilmaydi. Ishdan bo'shash uchun ham ruxsatnoma olish kerak bo‘ladi.
Bloomberg manbalariga ko'ra, bu choralarning barchasi Xitoy moliyaviy regulyatorlarining tegishli ichki buyruqlaridan keyin amalga oshirilmoqda. Ular hozirda kompaniyalarning birlamchi ommaviy takliflarini va kapitalni oshirishning boshqa tartiblarini sinchkovlik bilan o‘rganmoqdalar va istalgan vaqtda investitsiya bankirlarini so‘roqqa chaqirishlari mumkin.
Agentlik manbalarining ta'kidlashicha, xodimlari hibsga olingan brokerlik kompaniyalarida ishdan bo'shatishlar ro‘y berishi kutilmoqda. Xitoyda jami 147 ta brokerlik firmasi mavjud bo‘lib, ularda 8700 dan ortiq investitsiya bankirlari ishlaydi.
Yilning birinchi yarmida ushbu kompaniyalarning umumiy daromadi 203 milliard yuandan (28,5 milliard dollar) oshdi, bu o'tgan yilga nisbatan 9 foizga kam.
Izoh (0)