O‘zbekiston “Adolat” sotsial-demokratik partiyasining XII Qurultoyida “Teng imkoniyatlar va adolatli jamiyat sari!” saylovoldi dasturi tasdiqlandi.
Eslatib o‘tamiz, 27-oktabr kuni O‘zbekistonda Qonunchilik palatasi va mahalliy Kengashlarga saylovlar bo‘lib o‘tadi.
“Adolat” partiyasining saylovoldi dasturida sud-huquq sohasi, sog‘liqni saqlash, ta’lim va fan, ekologiya va atrof-muhitni muhofaza qilish, tashqi va ichki siyosatga alohida e’tibor qaratilgan.
Shuningdek, sog‘liqni saqlash sohasiga zamonaviy axborot-kommunikatsiya texnologiyalarini joriy etish, “Aqlli tibbiyot” tizimini shakllantirish, nodavlat tibbiyot tashkilotlarini “tijorat tashkilotlari” maqomidan notijorat tashkilotlarga o‘tkazish, farmatsevtika va tibbiyot xodimlari o‘rtasidagi yashirin til biriktirganligi uchun jinoiy javobgarlikni belgilash, joylarda aholiga malakali tibbiy yordam xizmatlarini ko‘rsatish, giyohvandlik vositalarining noqonuniy aylanishi ustidan nazoratni kuchaytirish, samarali qonunchilik mexanizmlarini ishlab chiqish kabi qator muhim tashabbuslar partiya dasturida aks ettirilgan.
Shuningdek, partiya dasturida “Sudyalar maqomi to‘g‘risida”gi Qonunni ishlab chiqish va advokatura institutini rivojlantirish, sog‘lomlashtirish bog‘lari va bayram tadbirlari o‘tkaziladigan joylarni xususiylashtirishni taqiqlash, nogironligi bo‘lgan shaxslar uchun svetoforlarga maxsus ovoz berish moslamalarini o‘rnatish kabi g‘oyalar ilgari surildi.
Yana bir muhim jihatlaridan biri, talabalarning uy-joy bilan bog‘liq muammolarini bartaraf etish, o‘quv adabiyotlarni qayta ko‘rib chiqish orqali oliy ta’lim muassasalarida ta’lim sifatini oshirish, zamonaviy xorijiy adabiyotlarni o‘zlashtirish va tarjima qilish bo‘yicha tizimli ishlarni yo‘lga qo‘yish, shuningdek, ilmiy soha vakillarining manfaatlarini ta'minlash va olimlarning mashaqqatli ishiga munosib baho berish kabi masalalarga alohida e’tibor qaratilgan.
Qurultoy doirasida bo‘lajak saylovda partiyadan O‘zbekiston Respublikasi Oliy Majlisi Qonunchilik palatasi deputatligiga bir mandatli majoritar saylov okruglari bo‘yicha 75 nafar va partiya ro‘yxati bo‘yicha 100 nafar nomzod tasdiqlandi.
Ularga tegishli barcha hujjatlar deputatlikka nomzodlarni ro‘yxatga olish uchun belgilangan tartibda Markaziy saylov komissiyasiga taqdim etilishi ma’lum qilindi.
Izoh (0)