Tailandda maymunchechakning 1b turi bilan kasallanishning ilk holati qayd etildi. Bu haqda Nation Thailand xabar berdi.
![](/static/2024/08/21/photo_2024-08-21_12-52-09-B_xXv3G4.jpg)
Ma’lum qilinishicha, Afrika davlatlarida bo‘lib qaytgan fuqaroga kasallik tashxisi qo‘yilgan. Tailandda 2022-yil yanvaridan 2024-yil 11-avgustigacha bo‘lgan davrda maymunchechak bilan kasallanishning 827 ta holati qayd etilgan bo‘lib, ularning barchasi 2b turi bilan bog‘liq bo‘lgan.
Maymunchechak virusli kasallik bo‘lib, asosan markaziy va g‘arbiy Afrikaning chekka hududlarida tropik o‘rmonlar yaqinida uchraydi. Ushbu kasallikni hayvonlardan odamlarga yuqtirishning birinchi holati 1970-yilda Kongo demokratik respublikasida qayd etilgan.
Kasallik qanday simptomlarga ega?
Dastlabki simptomlar infeksiya yuqqanidan keyin 5—21-kuni paydo bo‘ladi. Avvaliga simptomlar grippni eslatadi va quyidagicha namoyon bo‘ladi:
- yuqori harorat;
- bosh va mushaklardagi og‘riqlar;
- bel og‘rig‘i;
- kattalashgan limfa tugunlari;
- titroq;
- holdan toyish;
- 1-5 kundan keyin simptomlarga toshma qo‘shiladi. U yuzdan boshlanadi va pastki a’zolarga tarqaladi.
Bu sirtdan suvchechakni eslatadi: paydo bo‘lgan qizil dog‘lar o‘rnida tiniq yoki sarg‘ish pufakchalar hosil bo‘ladi, ular quriydi, keyin esa to‘kiladi.
Maymunchechakdan qanday himoyalanish mumkin?
Agar sayohat qilishni rejalashtirayotgan bo‘lsangiz, ehtiyot choralarini bilishingiz kerak:
- Yovvoyi daydi hayvonlar, xususan, kemiruvchilardan ehtiyot bo‘ling, ayniqsa, ular chechak tarqalgan hududlarda yashasa va nosog‘lom ko‘rinishga ega bo‘lsa. Ularning murdasiga tegmang va yovvoyi hayvon go‘shtini yemang.
- Zararlangan hayvon tegishi mumkin bo‘lgan narsalarga yaqinlashmang.
- Umumiy choyshab va gigiyena buyumlaridan foydalanmang va imkon qadar bemor odamlar bilan yaqin aloqada bo‘lmang.
- Gigiyena qoidalariga rioya qiling — qo‘llarni sovunlab yuving yoki spirtli dezinfeksiyalovchi vositalardan foydalaning.
- Agar zararlangan odamlarni parvarish qilsangiz, shaxsiy himoya vositalaridan foydalaning.
Izoh (0)