O‘zbekistonlik taniqli MMA jangchisi Ramazon Temirov rasman UFC bilan shartnoma tuzdi va u jahonning eng kuchli promoushenida 12-oktyabr kuni debyut qiladigan bo‘ldi.
Sportchi bunga qadar yana bir nufuzli liga—Rizin’da o‘z janglarini o‘tkazib kelayotgandi. Ramazon Temirov hozirda 9 ta g‘alabali seriyaga ega. U super yengil (57,6 kg) hamda o‘ta yengil (61,2 kg) vazn toifasida oktagonga ko‘tarilgan.
Ramazon tashkilot bilan 4 ta jang uchun kelishuvga erishgan.
27 yoshli Temirovga UFC’dagi birinchi jangida amerikalik Si Jey Vergara raqiblik qiladi. Vergara shu kungacha UFC’da oltita jang o‘tkazib, uchta g‘alaba va uchta mag‘lubiyat qayd etgan.
Temirov faoliyati davomida 19 ta jang o‘tkazib, 17 ta g‘alaba va 2 ta mag‘lubiyat qayd etgan.
Jang UFC Vegas 98 turniri doirasida o‘tkaziladi.
