Turkiyada 2-avgust kuni kirish cheklangan Instagram to‘qqiz kun o‘tib blokdan chiqarildi.
“Biz avvalboshdanoq ijtimoiy media platformalari Turkiya Respublikasi qonunlarini hurmat qilishini xohlagan edik. Instagram vakillari bilan olib borgan muzokaralarimiz natijasida blokni olib tashlaymiz. Ular bizning talablarimizni qondirishga va’da berishdi”, degan mamlakat transport va infratuzilma vaziri Abdulqodir Uralog‘li X ijtimoiy tarmog‘ida.
Uning aniqlik kiritishicha, talablar, shu jumladan, foydalanuvchilar kontentiga nisbatan senzura va tarqatilishi Turkiya qonunchiligi bo‘yicha jinoyat hisoblangan va o‘chirib tashlanishi lozim bo‘lgan materiallarni olib tashlash bilan bilan ham bog‘liq edi.
Turkiyada Instagram 10-avgust kuni soat 21:30 dan boshlab faoliyatini tikladi. Turkiye Gasetesi’ning yozishicha, mamlakatda ushbu ijtimoiy tarmoqdan 60 million kishi foydalanadi.
Instagramʼga kirish Turkiya axborot texnologiyalari va aloqa boshqarmasi qarori bilan 2-avgust kuni bloklangandi. Rasmiylar ijtimoiy tarmoqning bloklanishi rasmiy sababini keltirmagan bo‘lsa-da, Turkiya prezidenti maʼmuriyati aloqa bo‘limi rahbari Fahrettin Altun qaror Ismoil Haniya o‘limi munosabati bilan paydo bo‘lgan hamdardlik chellenjiga Instagram tomonidan taqiq qo‘yilishi ortidan qabul qilinganiga ishora qilgandi.
Izoh (0)