Amerikalik aktyor Timoti Shalame bilan ishlagan insayderlar Bob Dilan haqidagi “Mutlaqo notanish” biografik filmining suratga olish jarayonida aktyorni axloqsiz xatti-harakatlar qilganlikda ayblamoqda, deb yozadi “Korrespondent.net” nashri.
Ma’lum bo‘lishicha, intervyu va turli shoularda go‘zal xulqi va tavozesi bilan ajralib turgan Timoti Shalame suratga olish maydonida o‘zini boshqacha tutadi va qo‘pol xatti-harakatlar qiladi. Syomka guruhi a’zolaridan biri u haqda: “Timoti o‘zini xudbinlarcha va ruhiy kasal insondek tutar, suratga olish ishlari boshlanishidan avval boshqa xodimlar uning ko‘ziga qarashi yoki o‘zini tanishtirishi taqiqlangan edi”, deya salbiy fikrlarini bildirdi.
Guvohlar ma’lumotiga ko‘ra, aktyorning hamkasblari quyosh tutilishini suratga olayotganda Shalame tasodifan kameraga tushib qolgan. Shu sababli Timoti prodyuser yordamchisiga qo‘pol so‘zlarni yog‘dira boshlagan va ayolni smartfonidagi barcha suratlarni o‘chirib tashlashga majburlagan. Shu voqeadan keyin Shalame prodyuserlardan aktyorlar va suratga olish jamoasi uyali telefonlardan foydalanishini qat’iyan taqiqlashni talab qilgan.
Bundan tashqari, Timoti so‘nggi daqiqada hojatxonali treyler talab qiladi va natijada 120 nafar aktyor va 150 ta tasvirga olish guruhi a’zolari boshqa hojatxonadan foydalanishga majbur bo‘ladi.
“Uni o‘zidan boshqa hech kim qiziqtirmaydi”, deydi insayderlardan biri.
Ammo suratga olish maydonida nafaqat “Dyuna” yulduzi, balki “Mutlaqo notanish” filmi rejissyori ham o‘zining yomon xulqi bilan ajralib turgan. Ma’lum bo‘lishicha, Jeyms Mengold ham qo‘l ostidagilarga doimo qo‘pol va shafqatsiz munosabatda bo‘lgan va hatto bir kuni o‘z yordamchisini itarib yuborgan.
Izoh (0)