“Yovvoyi ayol” va “Qonundagi mallasoch” filmlaridagi obrazlari orqali tanilgan Riz Uizerspun YouTube’dagi mashhur The Home Edit shousida ishtirok etdi. Loyihada yulduzning oshxonasi ajoyib tarzda tariflab berildi.
48 yoshli aktrisaning 4 million dollarlik hashamatli uyida o‘ziga xos dizaynga ega oshxonasi alohida e’tiborga sazovor. Ushbu xonani ko‘rib aktrisa chindan ham pazandalikni yaxshi ko‘rishiga shubha qolmaydi.
Neshvillda joylashgan mazkur xonadonda shiftdan yergacha davom etgan keng derazalar, g‘ishtin dekoratsiyalar, marmar peshtaxtalar ko‘zni qamashtiruvchi ko‘k rangli devorlar uyga o‘zgacha ko‘rk bag‘ishlaydi.
The Home Edit shousining asosiy maqsadi ishtirokchilarning uyini yanada shinam, qulay bo‘lishiga yordam berishdir. Tashkilotchilar Uizerspun oshxonasini tartibga keltirishga qaror qildi: mutaxassislar birinchi navbatda oshxona idishlarini, sochiqlarni va boshqa predmetlarni saralab chiqdi. Oshxonadagi narsalarning bari rang va mahsulot turi bo‘yicha qayta tartibga solindi.
Dizaynerlar oshxonani qayta tartiblab bo‘lgach, xonadon egasi Rizni chaqirdi va aktrisa natijalarni baholash uchun oshxonaga qaytdi.
“Ey Xudo! Qizlar, bu aqlbovar qilmaydigan narsa! Meni juda xursand qildingiz! Bekalar oshxonaga kirganda yumushlarini tez-tez bajarishi uchun barcha narsalar o‘z joyida turishi katta qulaylik beradi. Barcha narsa shaffof idishda va qulay tartibda joylashgani menga juda yoqdi. Sizlardan minnatdorman”, dedi aktrisa tashkilotchilarga qarata.
Ma’lumot o‘rnida, Riz Uizerspun 1976-yilning 22-mart sanasida AQSHda tug‘ilgan. U kinodagi faoliyati davomida “Oydagi odam”, “Qonundagi mallasoch” filmlarida suratga tushgan. Aktrisa mart oyining oxirida turmush o‘rtog‘i Jim Tot bilan ajrashdi. Juftlik 2011-yilda turmush qurgan edi. Riz va Jim Tennessi shtatida farzand tarbiyasi bilan band edi. Uning aktyor Rayan Filipp bilan nikohidan yana ikki nafar farzandi bor.
Izoh (0)