Mart oyida Osiyoning eng boy odami — Mukesh Ambani kichik o‘g‘li 28 yoshli Anant Ambani va uning 29 yoshli qallig‘i Radhika Merchantning 3 kunlik to‘yoldi bazmini nishonladi. Mehmonlar orasida Bill Geyts, Mark Sukerberg, Hillari Klinton, Ivanka Tramp ham bor edi. Ertaga, 12-iyul kuni asosiy to‘y marosimi bo‘lib o‘tadi, bu turli hisob-kitoblarga ko‘ra, oilaga 113 million dollarga tushmoqda.
Dunyodagi eng katta xususiy uy
Ambani oilasining 27 qavatli uyi Mumbayda joylashgan bo‘lib, bu xususiy majmua “Antiliya” deb nomlanadi. Aytish joizki, uy qimmatligi bo‘yicha dunyoda ikkinchi o‘rinda turadi. Uning balandligi 173 metr, maydoni esa 37 ming kvadrat metrga yaqin. Taqqoslash uchun, Rimdagi Kolizey 24 ming kvadrat metrni, Afina Akropoli esa 30 ming kvadrat metrni egallaydi — mazkur uyning o‘rnida uchta Eyfel minorasi joylashishi mumkin.
Turli manbalarda aytilishicha, 168 ta mashina sig‘dira oladigan avtoturargoh uchun binodan 6 qavat ajratilgan. Oxirgi maʼlumotlarga ko‘ra, bu xususiy osmono‘par binoga 600 ga yaqin doimiy xodimlar xizmat ko‘rsatadi.
Spa, suzish havzalari va vertolyot maydonchalari
Uy chikagolik arxitektorlar Perkins+Will tomonidan loyihalashtirilgan. Ta’kidlash joizki, byuro dunyodagi eng yirik obyektlarni loyihalash bilan shug‘ullanadi. Ambanining xususiy uylaridan biri bo‘lgan bu uy 2006-yildan 2010-yilgacha qurilgan.
U Atlamound-roud, mashhur Cumballa Hill’da qurilgan bo‘lib, bu joylarda yer narxi bir kvadrat metr uchun 10 ming dollargacha yetishi mumkin.
Ushbu uyning xususiyatlari:
- osma bog‘lar va teraslar. Uyda ularning bir nechtasi bor va bog‘larda o‘simliklarning noyob va nafis navlari mavjud.
- xavfsizlik. Mahalliy aholi va sayyohlarga uyni videoga olish yoki suratga olish taqiqlanadi. Agar xavfsizlik xizmati kamerani payqasa, ular sizdan barcha rasmlarni o‘chirib tashlashingizni so‘raydi.
- balet zali
- diniy marosimlar uchun ibodatxona.
- sog‘liqni saqlash markazi. Xususiy majmuada shifokorlar va kerakli xodimlarga ega to‘liq jihozlangan kurort va sog‘lomlashtirish markazi mavjud.
- uchta vertolyot maydonchasi.
- 50 o‘rinli kinoteatr
- muzqaymoq yeyish uchun shaxsiy kafeteriya.
- jaziramadan himoya qilishga mo‘ljallangan “qorli” xona.
- bino Rixter shkalasi bo‘yicha 8 balli zilzilaga bardosh beroladigan qilib qurilgan.
Reliance Industries ma’lumotlariga ko‘ra, bino qurilishi milliarderlarga 50-70 million dollarga tushgan. Biroq 14 yil o‘tib, uning qiymati hozirda 1-2 milliard dollarga baholanishi mumkin — bu esa turar joyni dunyodagi eng qimmat uyga aylantiradi.
Uyni saqlash xarajatlari
Ommaviy axborot vositalarida Ambani oilasining sarf-xarajatlari haqida tez-tez xabar beriladi. Bundan tashqari, milliarder xodimlariga katta miqdorda maosh to‘lashini ta’kidlaydi. Uning shaxsiy haydovchisi, oshpazi va uy boshqaruvchisi oyiga taxminan 3000 yevro maosh oladi. Manbalarning yozishicha, uyning har oylik xarajatlari oila boshlig‘iga 290 ming dollarga tushadi.
Ambanining avtomobillari
OAV xabarlariga ko‘ra, Ambanilar oilaviy avtoturargohida qimmatbaho avtomobillar kolleksiyasi yig‘ilgan. Masalan, Aston Martin Rapide, Bentley Bentayga, BMW 760Li, Mercedes-Maybach S600 Guard, Ferrari 812 Superfast, Lamborghini Urus, Maserati Levante, Rolls-Royce Cullinan kabi jahon avtomobilsozlik sanoatining eng qimmat modellari shular jumlasidandir. Pushtirang Rolls-Royce Cullinan Mukeshning rafiqasi Nita Ambaniga tegishli.
Izoh (0)