Xalqaro jinoiy sudning (XJS) Ikkinchi sudgacha palatasi Rossiya sobiq mudofaa vaziri Sergey Shoygu va Bosh shtab rahbari Valeriy Gerasimovni hibsga olishga order berdi.
Sud matbuot bayonotida aytilishicha, orderlar “Ukrainadagi vaziyat doirasida kamida 2022-yil 10-oktyabrdan 2023-yil 9-martgacha sodir etilgan xalqaro jinoyatlar uchun berilgan.
Shoygu va Gerasimov fuqarolik obyektlarini nishonga olish, tinch aholi va fuqarolik obyektlariga haddan tashqari ko‘p zarar yetkazish va insoniyatga qarshi g‘ayriinsoniy xatti-harakatlar uchun javobgardirlar, — deb ta’kidlagan XJS.
Press-relizda, shuningdek, ular birgalikda va/yoki boshqalar orqali qilmishlarni sodir etgani, jinoyat sodir etishga buyruq bergani va (yoki) o‘z qo‘mondonligidagi kuchlar ustidan tegishli nazoratni amalga oshirmagani uchun yuqorida qayd etilgan jinoyatlar uchun yakka tartibda jinoiy javobgarlikka tortilishiga asoslar mavjudligi aytilgan.
Xalqaro jinoiy sud, xususan, Ukrainaning elektr energetika infratuzilmasi va boshqa fuqarolik obyektlariga raketa hujumlarini shu kabi jinoyatlar qatoriga kiritgan. Hisobotda ta’kidlanishicha, bunday orderlarning mazmuni odatda guvohlarni himoya qilish va tergov xavfsizligini ta’minlash uchun sir bo‘lib qoladi. Biroq Rossiyadan bunday hujumlar davom etayotganini inobatga olgan holda, sud ommani hibsga olish orderidan xabardor qilish keyingi jinoyatlarning oldini olishga yordam beradi, deb hisoblagan.
- Rossiya prezidenti Vladimir Putin may oyida Sergey Shoyguni mudofaa vaziri lavozimidan ozod qilgan edi. Uning o‘rnini iqtisodchi Andrey Belousov egallagan.
Izoh (0)