Yaman qirg‘oqlari yaqinida muhojirlar qayig‘i cho‘kib ketishi oqibatida kamida 38 kishi halok bo‘lgan. Bu haqda Yamandagi manbalarga tayanib, BBC nashri xabar berdi.
Omon qolganlarning maʼlum qilishicha, halokatga uchragan qayiqda 250 nafar muhojir bo‘lgan. Kuchli shamol oqibatida qayiq Yaman suvlarida ag‘darilib ketgan.
Bedarak yo‘qolgan 100 ga yaqin muhojir qidirilmoqda. Qizil dengiz bo‘yidagi mamlakatlardan qidiruv-qutqaruv ishlariga yordam berish so‘ralgan.
Adan sharqida joylashgan Rudum mahalliy maʼmuriyatning maʼlum qilishicha, qayiqdagilar asosan Efiopiyadan kelgan muhojirlar bo‘lgan. Ular Yamandan Fors ko‘rfazi davlatlariga borish uchun tranzit nuqtasi sifatida foydalanishni maqsad qilgan.
Yaman qirg‘oqlarida suzayotgan baliqchilar halokatga uchragan qayiqdan 78 nafar kishini qutqarib olgan. Mahalliy aholi vakillari ularga birinchi yordam ko‘rsatishga uringan.
BMT maʼlumotlariga ko‘ra, so‘nggi 1 yil ichida Afrikadan Yaman dengiz hududiga 97 mingdan ortiq muhojir kirib kelgan. Husiylarning Qizil dengizdagi kemalarga hujumlariga qaramay, muhojirlar oqimida o‘sish kuzatilgan.
Izoh (0)