Samarqandda magistral quvurdagi nosozlik tufayli ko‘chalarni suv bosdi

Samarqand shahrida katta bosimdagi markaziy suv quvurida 27-may kuni nosozlik yuzaga keldi. Bu haqda shahar hokimligi matbuot xizmati xabar berdi.

Qayd etilishicha, Cho‘pon ota suv inshootidan kelayotgan diametri 1000 millimetrlik katta bosimdagi markaziy suv quvurida favqulodda nosozlik yuzaga kelgan. Ayni paytda taʼmirlash ishlari olib borilmoqda.

Shu sababli Zarafshon shox, Andijon, Usta Umar Jo‘raqulov, Panjikent, So‘zangaron, Navoiy shoh, Sadriddin Ayniy, Amir Shohmurod, Registon, Termiz, Universitet xiyoboni, Orzu Mahmudov, O‘zbekiston, Firdavsiy, Abdurahmon Jomiy, Amir Temur, Mirzo Ulug‘bek, Akbar Otaxo‘jayev, Bobur Mirzo ko‘chalari hamda ushbu ko‘chalarga tutash mahalla va hududlarda vaqtincha ichimlik suvi to‘xtatilgan.

“Samarqand suv ta’minoti”ning ma’lum qilishicha, ushbu suv quvuri o‘tgan asrning 80 yillarida qurilgan bo‘lib, bugungi kunda shahar aholisining katta qismiga suv yetkazib beradi.

28-may soat 07:55 holatiga ko‘ra, nosozlikni bartaraf etish ishlari davom etmoqda. Shaharning tarmoqdan uzilgan hududlariga grafik asosida maxsus texnikalar orqali aholiga ichimlik suvi yetkazib berilmoqda.