UFC jangchisi Jon Jons 2024-yil noyabr oyida oktagonga qaytishini ma’lum qildi.
Jons so‘nggi bor 2023-yil 5-mart kuni UFC 285 turniri doirasida bo‘lib o‘tgan jangda Jon Jons og‘ir vazn toifasida vakant kamar uchun Siril Ganga (11-2) qarshi jang qilgandi. Yarim og‘ir vazn toifasining sobiq chempioni birinchi raunddayoq Ganni bo‘g‘ish usuli bilan taslim etib, og‘ir divizion tituliga ega chiqqandi.
Jonning keyingi jangi 10-noyabrda UFC 309 doirasida Stipe Miochichga qarshi bo‘lib o‘tishi mumkin. Bu borada muzokaralar olib borilayotgani xabar qilindi.
“10-noyabr. Medison-skver-garden”, — deb yozgan Jon Jons ijtimoiy tarmoqdagi sahifasida. Shundan so‘ng darhol bu yozuvni o‘chirib tashlagan.
Eslatib o‘tamiz, Jon Jons 2023-yilning noyabrida Miochichga qarshi jang qilishi kerak edi. Biroq Jonning jarohati tufayli jang bekor bo‘lgandi.
