O‘zbekistonda yana ikkita shamol elektr stansiyasi quriladi

Prezident qarori bilan Samarqand va Jizzax viloyatlarida ikkita shamol elektr stansiyasini qurish bo‘yicha investitsiya shartnomalari tasdiqlandi.

Ushbu loyihalarning pudratchilari sifatida Xitoyning Universal Energy kompaniyasi sho‘ba korxonalari Peak Wind Alpha va Peak Wind Beta MCHJlar ko‘rsatilgan. Majburiyatlar bajarilishi uchun 9 million dollarlik bank kafolati ko‘zda tutilgan.

Har bir loyiha doirasida 250 megavatt quvvatga ega shamol elektr stansiyalari, elektr uzatish liniyalari quriladi. Investor har bir loyihani amalga oshirish uchun 250 million dollar ajratadi.

Ushbu shamol elektr stansiyalarida ishlab chiqarilgan elektr 25 yil davomida sotib olish majburiyatini olgan “O‘zbekiston Milliy elektr tarmoqlari”ga sotilishi kafolatlangan.

Eslatib o‘tamiz, Universal Energy kompaniyasi bilan investitsiya shartnomalari 25-yanvar kuni imzolangandi.