G‘arb qo‘shinlarini Ukrainaga yuborish Uchinchi jahon urushi boshlanishiga olib kelishi mumkin. Bu haqda Vengriya tashqi ishlar vaziri Peter Siyyartoga tayanib, “Kommersant” xabar berdi.
Vazirning so‘zlariga ko‘ra, Ukrainadagi harbiy konfliktni hal qilish uchun o‘t ochishni to‘xtatib, muzokaralar boshlash kerak. Agar Yevropa yoki Amerika askarlari Ukraina hududiga qadam bossa, bu “qizil chiziqdan o‘tishni” anglatadi.
“Agar NATOga a’zo davlat Ukrainaga harbiylarini yuborsa, bu NATO va Rossiya o‘rtasida to‘g‘ridan-to‘g‘ri qarama-qarshilik bo‘lishini anglatadi, gap Uchinchi jahon urushi haqida ketmoqda”, — deydi Siyyarto.
Shuningdek, u davlatlardan biri yadro qurolidan foydalanishi ehtimoli haqidagi bayonotlardan xavotirda.
“U yoki bu tomon yadro qurolidan foydalanishga qaror qilsa, bu sayyoramizning oxiri bo‘lishini juda yaxshi bilamiz”, — deya ta’kidladi Vengriya tashqi ishlar vaziri.
Eslatib o‘tamiz, fevral oyi oxirida Fransiya prezidenti Emmanuel Makron Ukrainaga G‘arb qo‘shinlarini yuborishni istisno etmadi, biroq bir necha kundan so‘ng u hali buni amalga oshirish niyatida emasligini aytdi.
Aprel oyi boshida NATO bosh kotibi Yens Stoltenberg alyans Ukrainaga jangovar bo‘linmalarni yuborishni rejalashtirmayotganini bildirdi. Kreml Fransiyaning Ukrainaga qo‘shin yuborishi “tuzatib bo‘lmaydigan oqibatlarga olib kelishi”dan ogohlantirdi.
Izoh (0)