Ekologiya vaziri maslahatchisi, jamoatchilik faoli Rasul Kusherbayev poytaxtda tuman ekologiya bo‘limi mas’ullari IIB xodimlari hamda prokuratura organi tomonidan qo‘shib yozishga majburlanayotgani, buni bajarmagan mas’ullar 10 soatlab IIB binosida noqonuniy ushlab turilganini xabar qilgandi. Toshkent shahar prokuraturasi axborot xizmati rahbari Xurshida Rahmonovaning “Daryo”ga bildirishicha, holat Toshkent shahar prokurori Erkin Yo‘ldoshev nazoratiga olingan.
Voqea haqida xabar berilgach, shu zahoti bu haqda shahar prokuroriga ma’lumot kiritdik. Holat prokuror nazoratiga olindi va o‘rganish jarayonida, — deydi poytaxt prokuraturasi axborot xizmati rahbari Xurshida Rahmonova.
Vazir maslahatchisiga ko‘ra, qo‘shib yozishga majburlanganlardan biri — Yakkasaroy tumani ekologiya bo‘limi boshlig‘i Kamoliddin Bekturganov 2024-yilning 29-mart kuni tungi soat 03:00 da Ichki ishlar bo‘limi xodimlari tomonidan uyidan olib ketilib, ekilmagan daraxtlarni “Yashil makon” platformasiga kiritib, tasdiqlashi talab qilingan. U chamasi 10 soatlar ichki ishlar xodimlari tomonidan noqonuniy ushlab turilgan.
“Daryo” jurnalisti bilan suhbatda bo‘lgan Yakkasaroy tuman Ekologiya bo‘limi boshlig‘i Kamoliddin Bekturganov haqiqatan ham o‘sha kuni ekilmagan ko‘chatlarni ekildi deb tasdiqlashga majburlanganini aytdi.
Shu ish bo‘yicha hozir Toshkent shahar prokuraturasiga ham chaqirilganmiz. Keldik, — deydi poytaxt prokuraturasiga chaqirilganini aytgan tuman ekologiyasi boshlig‘i.
Toshkent shahar IIBB axborot xizmati mas’ullari “Daryo”ning bu haqdagi savoliga javob berar ekan, Toshkent shahar IIBB rahbariyati bunday holatni bilsa, albatta, bunga yetarlicha javob berishini aytib, holatni o‘rganishini va tez orada batafsil ma’lumot berishini bildirdi.
Kusherbayevning bildirishicha, belgilangan reja bo‘yicha Toshkent shahrida bahor mavsumida 600 ming dona ko‘chat ekilishi kerak.
Tartibga ko‘ra, ekilgan ko‘chatlar tuman hokimliklaridagi shtablar tomonidan “Yashil makon” platformasiga kiritiladi. So‘ngra bu ma’lumot tuman ekologiya bo‘limi xodimlari tomonidan joyiga borib tekshirilgach, tasdiqlanadi. O‘tgan vaqtda poytaxtda “Yashil makon” platformasiga kiritilib, haqiqatda ekilmagan 41 mingdan ortiq ko‘chatlarni ekologiya xodimlari tasdiqlashmagan. Bu esa tuman hokimliklari, IIB va prokuratura tomonidan ekologiya xodimlariga bosim o‘tkazilishiga olib kelgan, — deydi Rasul Kusherbayev.
Vazirlik mas’uliga ko‘ra, Uchtepa tumani hokimligi esa tuman Ekologiya bo‘limi xodimlarini ofisiga kiritmay, ularga bosim ham o‘tkazgan.
“Daryo” jurnalisti bilan suhbatlashgan Uchtepa tuman Ekologiya bo‘limi boshlig‘i O‘ktam O‘tkirov mehnat ta’tilida bo‘lgani bois bu voqeadan xabari yo‘qligini, xodimlariga bosim bo‘lgan yoki bo‘lmaganidan bexabar ekanini aytdi.
O‘ktam O‘tkirov tuman Ekologiya bo‘limi hokimiyat balansidagi binolarning biridan qo‘nim topganini, xodimlari o‘sha yerda faoliyat yuritishini tasdiqladi. Uchtepa tumani hokimligi axborot xizmati rahbari To‘ra To‘rayev esa voqeani batafsil o‘rgangach, ma’lumot berishini qo‘shimcha qildi.
Vazir maslahatchisining yozishicha, ekologlarga qo‘shib yozish haqida topshiriq berganlar orasida prokuratura xodimlari ham bor.
30-mart kuni kunduzgi soat 10:00 da Shayxontohur tuman Ekologiya bo‘limi boshlig‘i X.Mirahmedov chamasi uch soatlar tuman prokuraturasida noqonuniy ushlab turilib, ekilmagan daraxtlarni “Yashil makon” platformasiga kiritish hamda tasdiqlash talab qilingan, — deydi Rasul Kusherbayev.
Tahririyat Shayxontohur tuman Ekologiya bo‘limi mas’ulini topolmadi. Undan qo‘shimcha ma’lumot olish imkoni bo‘lmadi.
“Daryo” voqealar rivojini kuzatishda davom etadi.
Izoh (0)