Yurgen Klopp Germaniya terma jamoasi bosh murabbiyiga aylanishi mumkin.
Bild nashri jurnalisti Kristian Falkning ma’lum qilishicha, Germaniya terma jamoasi bosh murabbiyi Yulian Nagelsmann “Bavariya”ga o‘tib ketishi mumkin. Yozda Tomas Tuxel myunxenliklar murabbiylik postini tark etadi. Uning o‘rnini esa katta ehtimol bilan Nagelsmann egallashi kutilmoqda.
Agar Yulian Germaniya futbol uyushmasi (DFB) bilan shartnomani uzaytirmasa, tashkilot 2025-yilda Yurgen Kloppni taklif qilmoqchi. Shu tariqa Klopp terma jamoani JCH—2026 musobaqasiga tayyorlash uchun bir yil vaqtga ega bo‘ladi.
Yurgen dam olgunga qadar, Germaniya terma jamoasini Sandro Vagner vaqtinchalik boshqarib turishi, Hannes Volf esa uning yordamchisi bo‘lishi belgilandi.
Eslatib o‘tamiz, Klopp yanvar oyida “Liverpul”ni tark etishini aytgandi.
Yurgen 2015-yildan buyon “qizillar” bosh murabbiyi sifatida faoliyat olib bormoqda. Uning qo‘l ostida klub Chempionlar Ligasi, APL, klublar o‘rtasidagi JCH, Angliya Kubogi, Angliya Liga Kubogi, UEFA Superkubogi, Angliya Superkubogi kabi sovrinlarni qo‘lga kiritgan.
Izoh (0)