Og‘ir vaznda UFC chempioni unvonining amaldagi sohibi, amerikalik Jon Jons Albukerkedagi uyiga taqiqlangan moddalarga test olish uchun kelgan Drug Free Sport (DFS) antidoping xodimini o‘ldirish bilan tahdid qildi. Bu haqda Abq Raw xabar bermoqda.
Mavjud ma’lumotlarga ko‘ra, Jon Jons o‘ta mast bo‘lgan. DFS xodimi uyga kirganida, Jons testlarni topshirishdan bosh tortgan. Shundan so‘ng, u o‘ldirish bilan qo‘rqita boshlagan va xodimning telefonini ham olib qo‘ygan. Jarohat olgan erkak politsiyaga murojaat qilgan. Biroq ma’lumotlar bazasida Jonsga nisbatan jinoiy yoki ma’muriy ish hali ro‘yxatga olinmagan.
Eslatib o‘tamiz, Jon Jons o‘zining so‘nggi jangida fransiyalik jangchi Siril Ganni bo‘g‘ish usuli bilan mag‘lub etgandi.
