Italiya “Aspides” missiyasida ishtirok etishini ma’lum qildi

Italiya qonunchilari hukumat Yevropa Ittifoqining “Aspides” dengiz missiyasida ishtirok etishini ma’qulladi. Bu haqda Euronews xabar berdi.

Xabarga ko‘ra, Italiya qonunchilari mamlakatning Qizil dengizdagi yuk kemalarini Yamandagi “Ansor Alloh” (husiy) harakati isyonchilari hujumlaridan himoya qilish bo‘yicha YIning dengiz missiyasida ishtirok etishini ma’qullagan.

5-martdagi parlament yig‘ilishida “Aspides” bo‘yicha bo‘lib o‘tgan munozaralar Rim uchun muhim qadam bo‘lgan. Italiyaning missiyadagi ishtiroki nafaqat rasman maʼqullangan, balki Italiya operatsiyalarda taktik qo‘mondonlik nuqtayi nazaridan yetakchi rol o‘ynashi belgilangan.

Missiya 19-fevral kuni YI tomonidan rasman kelishilgan. Italiya missiyaning boshlanishini ma’qullagan oxirgi davlat bo‘lgan. Ayni paytda, italyan kemasi missiyada ishtirok etish uchun allaqachon Qizil dengizda va u yerda 12 oy qoladi.

Garchi Italiya hali rasman missiyaning bir qismi bo‘lmasa ham, so‘nggi kunlarda husiy isyonchilarining dronlarini urib tushirgani sababli muxolifat partiyalarining tanqidiga uchragan edi.

Italiya tashqi ishlar vaziri Antonio Tayani ovoz berishning kechiktirilishi qasddan amalga oshirilmaganini aytgan. Uning so‘zlariga ko‘ra, missiyaning ishga tushirilishi Yevropa mudofaasini qurishdagi muhim qadamdir.