Xalqaro Kurash Assotsiatsiyasi AIMS’ga a’zo bo‘ladi

Xalqaro Kurash Assotsiatsiyasi (IKA) AIMS’ga a’zolik jarayonlarini boshlaydi.

5-mart, seshanba kuni Tailandning Bangkok shahrida IKA prezidenti Haydar Farmon va AIMS prezidenti Stefan Foks o‘rtasida uchrashuv bo‘lib o‘tdi.

Uchrashuvda IKA prezidenti aprel oyida Buyuk Britaniyaning Birmingem shahrida bo‘lib o‘tadigan navbatdagi Sport Accord konvensiyalarida ko‘rgazma ishtirokchisi sifatida qatnashishi hamda IKA’ning AIMS’ga rasmiy a’zo bo‘lishi uchun arizasi muhokama qilindi. IKA’ning AIMS’ga rasman ariza berish uchun kerakli ma’lumotlar va hisobotlarni to‘plash jarayonlari boshlanganligi ma’lum qilindi.

Foks IKA’ning arizasini qo‘llab-quvvatlash borasidagi jarayonlarga o‘z yordamini ayamasligini e’lon qildi.

Ma’lumot uchun, AIMS — Mustaqil tan olingan sport a’zolari ittifoqidir. U 2009-yilda tashkil etilgan. AIMS’ning maqsadi har bir alohida sport turini mustahkamlash, tajribani birlashtirish, bilim almashish va Xalqaro Olimpiya Qo‘mitasi (XOQ) bilan yaqin hamkorlikni davom ettirishdan iborat bo‘lib, individual sport turi XOQ tomonidan rasmiy tan olinishiga erishadi. Ayni paytda AIMS 21 ta xalqaro sport federatsiyasiga to‘liq a’zo sifatida kiradi.