Shavkat Mirziyoyev Xorazm viloyatini ijtimoiy-iqtisodiy rivojlantirish vazifalari yuzasidan yig‘ilishda viloyat infratuzilmasini yaxshilashga alohida e’tibor qaratilishini aytdi.
Ma’lum qilinishicha, 2024-yilda 119 ta ko‘p qavatli uy qurib, 3,5 mingta oilaning yashash sharoitini yaxshilash rejalashtirilgan. “Yangi O‘zbekiston” massivlari tashkil etilib, 100 ta ko‘p qavatli uy qurilishi boshlanadi.
Mutasaddilarga Xiva shahri, Shovot va Hazoraspni urbanizatsiya bo‘yicha namunali hududga aylantirish choralarini ko‘rish topshirildi.
Yil yakunigacha Urganch va Xiva shaharlari hamda Gurlan va Tuproqqal’a tumanlarida oqova suv tarmog‘ini qurish loyihasi boshlanadi.
Elektr tarmoqlari, podstansiya va transformatorlarni to‘liq yangilash bo‘yicha uch yillik dastur ishlab chiqiladi. Bunda, 2024-yilda 1 ming kilometr tarmoq, 10 ta podstansiya va 500 ta transformatorni yangilash ko‘zda tutiladi.
Prezident kelgusi ikki yilda viloyatda tuproq yo‘llar umuman qolmasligi kerakligini ham aytdi.
Yaroqsiz yo‘llarning yarmini shu yilning o‘zida ta’mirdan chiqarish, Urganch—Shovot yo‘lining 20 kilometrini saqlashga xususiy sektorni jalb qilish topshirildi. Viloyatdagi 233 kilometr yo‘llar “hajm” usulida ta’mirlanishi, Tuproqqal’a, Hazorasp, Xonqa va Urganch tumanidan o‘tgan 4R-156 avtomobil yo‘lining 84 kilometri sement-beton qoplamaga o‘tkazilishi belgilandi.
Izoh (0)