Toshkentdagi maktabda o‘qituvchi va o‘quvchi o‘rtasida janjal yuz berdi

Toshkentdagi maktabda dars payti o‘qituvchi va o‘quvchi o‘rtasida janjal yuz berdi. Holat aks etgan video ijtimoiy tarmoqlarda tarqaldi.

Maktabgacha va maktab ta’limi vazirligi matbuot kotibi Dilfuza Sobirovaning ma’lum qilishicha, holat Chilonzor tumanidagi 103-maktabda sodir bo‘lgan. Hozirda Toshkent shahar MMTB o‘rganish olib bormoqda.

Ijtimoiy tarmoqlarda tarqalgan videoda o‘qituvchi o‘quvchini tortqilab, darsdan chiqarib yuborgani, bola bir necha bor bunga qarshilik qilgani, shuningdek, sinfdagi o‘quvchilar shovqin ko‘tarib, baqirgani aks etgan.

Tuman hokimligi matbuot xizmatining ma’lum qilishicha, voqea maktabning 6-sinf o‘quvchilari matematika darsida sodir bo‘lgan. Bolalar o‘qituvchi Yu.Portnovaning gaplariga quloq solmagan va tartibni buzgan. O‘z navbatida o‘qituvchi ham jahlini jilovlay olmasdan o‘quvchini majburlab sinfdan chiqarib yuborgan. Bola sinfdan chiqmaslik uchun o‘qituvchiga qarshilik ko‘rsatgan.

Maktabda yuz bergan bu voqea yuzasidan ota-onalar majlisi chaqirildi va ularning xohishiga ko‘ra matematika o‘qituvchisi Yu.Portnova mazkur sinf o‘quvchilariga dars o‘tishdan chetlashtirildi. Tartib buzgan bolalar va ularning ota-onasiga chora ko‘rish masalasi tuman hokimligi Bolalar masalalari bo‘yicha komissiya yig‘ilishida ko‘rib chiqiladigan bo‘ldi.