Toshkent shahrining Uchtepa tumanida harakatdagi Orlando avtomobilining motor qismida yong‘in chiqdi. Bu haqda poytaxt IIBB Yo‘l harakati xavfsizligi boshqarmasi matbuot xizmati xabar berdi.
Qayd etilishicha, 26-fevral kuni taxminan soat 08:15 larda Uchtepa tumani Kichik halqa yo‘li ko‘chasi 16-uy qarshisida harakatlanib ketayotgan 20 yoshli M.O. boshqaruvidagi Orlando rusumli avtomashinaning motor qismida elektr simlarining qisqa tutashuvi natijasida yong‘in sodir bo‘lgan. Yong‘in favqulodda vaziyatlar boshqarmasi xodimlari tomonidan o‘chirilgan. Yong‘in oqibatida tan jarohati olganlar yo‘q.
“Haydovchilardan transport vositalarining texnik holatini o‘z vaqtida ko‘rikdan o‘tkazishlarini hamda belgilangan qoidalarga rioya qilishlarini so‘rab qolamiz”, — deyiladi xabarda.
Eslatib o‘tamiz, 2023-yilning dekabrida Toshkent viloyatida harakatdagi Lacetti yonib ketgandi. Undan oldinroq Andijon viloyati Shahrixon tumanida Cobalt mashinasi yonib ketgani, Andijonda yo‘l chetida turgan Nexia’da yong‘in chiqqani, Qamchiq dovonida lak-bo‘yoq ortilgan yuk mashinasi yonib ketishi oqibatida bir necha kishi jabrlangani to‘g‘risida xabar berilgandi.
Izoh (0)