Vengriya prezidenti ortidan mamlakat Adliya vazirligi sobiq rahbari siyosatdan ketishini e’lon qildi

Vengriya sobiq adliya vaziri Yudit Varga Vengriya prezidentining iste’fosidan so‘ng siyosatdan ketishini e’lon qildi.

Prezident mehribonlik uyida jinsiy zo‘ravonlikka aloqador bo‘lgan shaxsni afv etish bo‘yicha qarorni imzolagani uchun siyosiy javobgarlikni u o‘z zimmasiga olgani haqida Facebook sahifasida yozib qoldirdi.

Varga deputatlik mandatidan voz kechishini va Yevropa parlamentiga saylovlarda Vengriya “Fides” partiyasi ro‘yxatini boshqarmasligini aytgan. U prezident qarorini imzolagani uchun siyosiy javobgarlikni o‘z zimmasiga olishi hamda siyosiy hayotni tark etishini qo‘shimcha qilgan.

10-fevral kuni Vengriya prezidenti Katalin Novak jamoatchilikning noroziligiga sabab bo‘lgan qaroridan so‘ng iste’foga chiqishini e’lon qilgandi. Reuters’ga ko‘ra, Vengriya prezidenti 2023-yilning aprelida, Rim papasi Fransisk tashrifi arafasida yigirmaga yaqin kishini ozod qilishga qaror qilgan. Ular orasida mehribonlik uyi direktorining o‘rinbosari ham bo‘lib, u tashkilot rahbariga voyaga yetmagan tarbiyalanuvchilarga nisbatan jinsiy tusdagi jinoyatlarini yashirishga yordam bergan.

Yudit Varga 2019-yildan buyon adliya vaziri lavozimida faoliyat yuritgan, 2023-yilning yozida isteʼfoga chiqqan.