Yolg‘on va’daga ishonib, 1,5 ming dollargacha to‘lov qilishgan — Shveysariya elchixonasi aholini firibgarlardan ehtiyot bo‘lishga chaqirdi

Shveysariyaning O‘zbekistondagi elchixonasiga Shveysariyada yashash va ishlash huquqini vositachilar orqali olganliklarini aytib, elchixonaga murojaatlar kelib tushmoqda. Bu haqda Shveysariyaning O‘zbekistondagi elchixonasi “Daryo”ga maʼlum qildi.

Aytilishicha, vositachilar Telegram kanallari va shaxsiy murojaatlar orqali firibgarlik yo‘li bilan soxta taklifnoma, shartnomalardan foydalanib Shveysariyaga ish takliflari, ishlashga ruxsat beruvchi hujjatlarni va’da qilgan.

Afsuski, odamlar yolg‘on va’da va hujjatlarga ishonib, 350 dollardan 1500 dollargacha bo‘lgan to‘lovlarni amalga oshirgan holatlar mavjud.

Shveysariya qonunlariga ko‘ra, O‘zbekistondan ishchi yollashni istagan Shveysariyadagi har bir ish beruvchi bunday ish o‘rni yaratish Shveysariyaning iqtisodiy manfaatlariga mos kelishini va ish beruvchi Shveysariyadan yoki Yevropa Ittifoqi/Yevropa erkin savdo assotsiatsiyasiga (EFTA) a’zo mamlakatlardan zarur kadrlarni yollay olmaganini isbotlashi kerak.

Masalan, Shveysariyadagi ish beruvchi o‘zbekistonlik ishchini yollashga ruxsat olishi uchun kantonal immigratsiya va bandlik bozori organlari hamda Migratsiya bo‘yicha davlat kotibiyatiga murojaat qilish uchun uzoq rasmiyatchilikdan o‘tishi kerak. Ish beruvchining arizasi aytib o‘tilgan organlar tomonidan ma’qullangachgina, ishchiga viza rasmiylashtirish jarayoni boshlanadi va bu holatda faqatgina Shveysariyaning Moskvadagi elchixonasi O‘zbekiston rezidentlari uchun milliy/mehnat vizasini rasmiylashtirish huquqiga ega, — deyiladi elchixona axborotida.

Elchixona Shveysariyada ishlash uchun ish taklifi olgan har bir kishidan hushyor bo‘lishni va har qanday shubhali shaxs yoki kompaniyaning Shveysariyada ishga joylashtirishni va’da qilib o‘z xizmatlari uchun haq talab qilayotganlarga ishonmaslikni so‘ragan.

Mehnat shartnomasi vositachi orqali emas, balki bevosita Shveysariyadagi ish beruvchisi bilan tuziladi. Agar siz bu kabi taklif olgan bo‘lsangiz va uning haqiqiyligiga shubhangiz bo‘lsa, qo‘shimcha ma’lumot uchun Shveysariyaning Moskvadagi elchixonasining viza bo‘limiga murojaat qilishingizni so‘raymiz, — deyiladi Shveysariyaning O‘zbekistondagi elchixonasining izohida.