Ijtimoiy tarmoqlarda Andijon viloyatidagi 3-son tergov hibsxonasida ayol kaltaklangani haqida xabar tarqaldi. Holat Inson huquqlari bo‘yicha vakil (ombudsman) tomonidan o‘rganildi.
Tarqalgan xabarda 29-noyabr kuni soat 20:05 da Andijon viloyatidagi 3-tergov hibsxonasida xodimlar mahbus ayol O.G‘.ni bir oylik chaqalog‘i bilan urib, tepib, turli xil uyatli so‘zlar bilan haqorat qilayotgani, shuningdek sovuq joyda saqlanayotgani aytilgan.
Mazkur holat bo‘yicha 30-noyabr kuni Oliy Majlisning Inson huquqlari bo‘yicha vakilining Andijon viloyatidagi mintaqaviy vakili, jamoatchilik vakillari bilan birgalikda o‘rganishlar olib bordi.
Mahbus ayol bilan suhbat davomida u ijtimoiy tarmoqda tarqatilgan xabarni tasdiqlab, ombudsman nomiga shikoyat yozgan. Farzandi olib qo‘yilgani va o‘zi tinchlantirish xonasiga joylashtirilganini esa tasdiqlamagan. Farzandi doim o‘zi bilan birga bo‘lgan va tinchlantirish xonasiga joylashtirilmagan.
Shuningdek, holatga aniqlik kiritish maqsadida O.G‘. bilan bir kamerada saqlanayotgan uch kishi bilan ham suhbat o‘tkazilib, ulardan ham holat yuzasidan tushuntirishlar olingan. Shu kuni sud tibbiy ekspertizasi o‘tkazilib, ekspertiza natijasiga ko‘ra, ayolning badanida tan jarohatlari aniqlanmagan.
Qayd etish lozimki, monitoring o‘tkazilgan kunda ona va bolaning sog‘lig‘i yaxshi ekani aniqlandi. Shuningdek, o‘rganish davomida hibsxonadagi kameralarning kuz-qish mavsumiga tayyorgarligi tekshirildi. O.G‘. saqlanayotgan va boshqa kameralardagi harorat belgilangan me’yorlarga muvofiqligi aniqlandi, — deyiladi ombudsman xabarda.
To‘plangan hujjatlar Jinoyat-prosessual kodeksida belgilangan tartibda ko‘rib chiqish uchun viloyat prokuraturasiga yuborilgan.
Izoh (0)