Xalq deputatlari Toshkent shahar kengashi qarori bilan poytaxtda ichimlik suvi taʼminoti va oqova suvi xizmatlari narxlari tasdiqlandi.
Jumladan, jismoniy shaxslar, budjet tashkilotlari va ulgurji isteʼmolchilar uchun suvning bir kub metri narxi 1400 so‘m (hozirda koeffitsiyent va QQSsiz 400 so‘m), oqova suv xizmatlari uchun 1000 so‘m (hozirda koeffitsiyent va QQSsiz 350 so‘m) etib belgilandi. Yuridik shaxslar uchun tariflar uch baravar oshirildi — ichimlik suvining har kub metri uchun 1000 so‘mdan 3000 so‘mgacha, kanalizatsiya xizmatlari uchun esa 820 so‘mdan 2200 so‘mgacha.
Tariflar qaror eʼlon qilinganidan keyin 15 kun o‘tgach, yaʼni 9-dekabrdan kuchga kiradi.
Oxirgi marta tariflar 2021-yil yanvarida oshirilgan edi. Eslatib o‘tamiz, ichimlik suvi taʼminoti va oqova suvi xizmatlari tariflariga maxsus qo‘shimcha to‘lov kiradi va 1,5 koeffitsiyent qo‘llaniladi.
Avvalroq “Toshkent shahar suv taʼminoti” korxonasi tariflarni oshirish zarurligini suv taʼminoti va kanalizatsiya tizimini saqlash xarajatlari keskin oshishi bilan asoslagan edi. Undan oldin esa Qashqadaryo, Surxondaryo va Toshkent viloyatida ichimlik suvi va oqova xizmatlar bo‘yicha yangi tariflar tasdiqlangandi. Andijon viloyatida esa 19-sentyabrda tasdiqlangan tariflarga ko‘ra narxlar o‘zgargan.
Izoh (0)