Toshkent viloyati Yangiyo‘l tumanida Matiz haydovchisi o‘ldirilib, mashinasi yoqib yuborilgani haqida xabarlar tarqaldi.
Bosh prokuratura matbuot xizmatining “Daryo”ga maʼlum qilishicha, holat yuzasidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan. Hozirda malakali xodimlardan iborat tezkor-tergov guruhi tomonidan jinoyatni fosh etish choralari ko‘rilmoqda.
Shu kabi holat Toshkent shahar Chilonzor tumanida ham kuzatilgan edi. 31-avgust kuni soat taxminan 18:00 larda 1996-yilda tug‘ilgan B.A. yashash manzilidan o‘z boshqaruvidagi qora rangli Gentra’da chiqib ketib, bedarak yo‘qolgan.
O‘tkazilgan tezkor-qidiruv tadbirlari davomida Chilonzor tumani, Bunyodkor ko‘chasidagi futbol sport maydoni hududida joylashgan avtoturargohda Gentra avtomashinasi ichida bedarak yo‘qolgan erkakning murdasi bosh yuz qismi bir necha qatlam polietilen paket bilan o‘ralgan holda topilgan.