Gonkong 1884-yildan buyon kuzatilmagan eng kuchli yog‘ingarchilik ostida qoldi. Shaharda bo‘ronli ob-havoning “qora” — eng yuqori darajasidagi ogohlantirish e’lon qilindi. Ko‘chalarni suv bosdi, jamoat transporti harakati to‘xtatildi. South China Morning Post xabariga ko‘ra, yomg‘ir qo‘shni Shenchjenga ham ta’sir qilgan.
Ekstremal ob-havo sharoiti tufayli 110 kishi tan jarohati oldi, ulardan to‘rt nafarining ahvoli og‘ir: ikki nafari baxtsiz hodisada, qolganlari esa yerga yiqilib jarohatlangan. Yomg‘ir paytida suv to‘playdigan hovuzga tushib ketgan bir kishi bedarak yo‘qolgan. Yana ikki kishi halok bo‘lgan.
Gonkong fond birjasi va HKEX kliring kompaniyasi ob-havo sharoiti tufayli savdo sessiyalarini bekor qildi.
“Qimmatli qog‘ozlar va derivativlar bozorlarida bugungi qora bo‘ron haqida ogohlantirish va ekstremal sharoitlar tufayli hech qanday savdo bo‘lmaydi”, — deyiladi birja veb-saytida.
Avvalroq birja rahbariyati kunlik sessiya ob-havo sharoitiga bog‘liq bo‘lishini ta’kidlab, ertalabki savdolarni bekor qilgandi.
Kuchli toshqinlar va yomon ob-havo sharoiti tufayli Gonkong meteorologiya observatoriyasi aholiga “vaqtinchalik boshpana sifatida xavfsiz joylarda qolishni” tavsiya qildi. 8-sentabr kuni ertalab eng yuqori darajadagi “qora” bo‘ron haqida ogohlantirish yetti soatdan ko‘proq vaqt amal qilishi aytildi, bu rekord muddat bo‘lib, oxirgi marta 1999-yil 23-avgustda o‘rnatilgan shunday ogohlantirish 5 soat 47 daqiqa davom etgan.
Xitoy janubidagi Guandun provinsiyasida ham rekord darajadagi yog‘ingarchilik kuzatildi. Shenchjenda yog‘ingarchilikning intensivligi butun meteorologik kuzatuvlar davrida tarixiy maksimal darajadan oshib ketdi, metro qisman suv ostida qoldi. Guanchjou meteorologiya observatoriyasi ma’lumotlariga ko‘ra, megapolis joriy yilning eng kuchli bo‘ronini boshdan kechirmoqda.
Gonkongda aholini kuchli yomg‘ir haqida ogohlantirish uchun uch darajali tizim qo‘llanadi. Sariq daraja yomg‘irning intensivligi 30 mm/soatdan, qizil daraja esa 50 mm/soatdan oshishini ko‘rsatadi. Bo‘ron haqida ogohlantirishning eng yuqori “qora” darajasi yomg‘ir intensivligi 70 mm/soat bo‘lganida e’lon qilinadi.
Izoh (0)