Charchoq, holsizlik va kayfiyat yomonlashishidan tashqari, kuzda avitaminoz yoki gipovitaminoz ham kuzatiladi. The Symbol nashri organizmga bu vaqtda qanday yordam berish mumkinligi haqida ma’lumot berib o‘tadi.
Parhezli muolaja
Ratsionda sog‘lom, rang-barang, yog‘, oqsil va murakkab uglevod hamda kletchatkalardan iborat balansli mahsulotlar o‘rin olishiga e’tibor qarating. Kuzgi taomnoma vitamin, mikroelementlar va immunitetni mustahkamlaydigan antioksidantlarga boy bo‘lishiga e’tibor bering. Tarkibida C vitamini, rux moddasi, magniy va omega-3 yog‘ kislotasiga boy mahsulotlarga e’tibor qarating.
Sog‘lom turmush tarzi
Birinchi navbatda chekish va spirtli ichimliklardan voz keching. Keyin esa ratsionni ko‘rib chiqing, toz havoda sayr qiling, sport bilan shug‘ullaning. Suv balansi me’yorda bo‘lishiga e’tibor qarating.
Kuningizni tartib bilan rejalashtiring
7-8 soat to‘liq uxlashga harakat qiling. Profilaktika maqsadida polivitaminli, mineral va mikroelementlarga boy komplekslar qabul qilsa ham bo‘ladi. Shu bilan birga, o‘zboshimchalik qilmaslik, shifokor ko‘rsatmasiga amal qilish zarur. Vitaminlar yetishmasligi organizmning maksimal darajada susayganida kuzatiladi. Bu, ayniqsa, bolalik, o‘smirlik va homiladorlik hamda laktatsiya davrida seziladi.
Har bir vitaminning yetishmasligi turlicha namoyon bo‘ladi. Masalan, A vitamini yetishmaganda ko‘rish qobiliyatida muammo, terining qurishi, tishlar sarg‘ayishi kuzatiladi. Ushbu tanqislikni qoplash uchun ushbu vitaminga boy mahsulotlar: jigar go‘shti, dengiz mahsulotlari, qorag‘at, o‘rik, sabzi va ismaloqni kanda qilmaslik kerak.
B1 vitamini yetishmaganda esa terining qurishi va qichishi kuzatiladi. Mushaklarning zaiflashishi, yurak ritmining buzilishi, nafas olish bilan bog‘liq muammolar va ishtahaning yomonlashishi bundan darak beradi. Shu sabab xamirturushli, non mahsulotlari, un va vitaminli komplekslarni qabul qilish kerak.
Vazn va ishtahaning kamayishi, shilliq qavatlar, terida muammo kuzatilishi, og‘iz bo‘shlig‘idagi yallig‘lanishlar B2 vitaminining yetishmasligidan darak beradi. No‘xat, go‘sht va sutda ushbu vitamin bisyor bo‘ladi. B6 vitaminining yetishmasligi ham eng ko‘p tarqalgan muammolardan sanaladi. Uning tanqisligi ko‘ngil aynishi, mushaklarning tortishishi va psixoz rivojlanishi bilan namoyon bo‘ladi. Tuxum sarig‘i, jigar go‘shti, pechda pishirilgan kartoshka, ismaloq va sabzi B6 vitaminining koni sanaladi.
C vitaminining yetishmasligi milklarning qonashi, kariyes, nafas va hazm bilan bog‘liq muammolar, charchoq va holsizlik hamda O‘RVI kuzatilishi bilan namoyon bo‘ladi. Davolash uchun ratsionda askorbinka kislotasiga boy meva va sabzavotlarni, masalan, qorag‘at, pomidor, ismaloq va na’matak, shuningdek, sitrus mevalar iste’mol qilish kerak.
D vitaminining yetishmasligi kariyes, bo‘g‘imlardagi og‘riq, uyqu buzilishi, suyaklarning mo‘rtlashishi va gormonal muammolar bilan namoyon bo‘ladi. Ushbu vitamin yetishmovchiligini tarkibida D vitamini bisyor bo‘lgan mahsulotlar bilan to‘ldirish kerak.
Izoh (0)