Rossiya hukumati Norvegiyani “do‘st bo‘lmagan davlatlar” ro‘yxatiga kiritdi, deb yozmoqda “RBK”.
Bunday ro‘yxatni shakllantirish haqidagi qarorni Vladimir Putin 2021-yilda G‘arb davlatlaridan rossiyalik diplomatlar ommaviy chiqarib yuborilganidan keyin imzolagan edi.
2022-yil iyul oyida ro‘yxatga Gretsiya, Daniya, Sloveniya, Xorvatiya va Slovakiya qo‘shildi. Bu mamlakatlarda Rossiyaning elchixonalari, konsulxonalari va vakillik davlat idoralariga xodim yollash imkoniyati cheklangan.
Rossiya hukumati taʼkidlaganidek, ro‘yxatda nafaqat mamlakatlarning nomlari, balki Rossiya hududidagi o‘sha mamlakatlarning vakolatxonalari bilan mehnat shartnomasini tuzgan fuqarolar nomi ham keltirilgan. Norvegiyadan 27 kishi “qora ro‘yxat”ga kirgan.
Aprel oyi o‘rtalarida Norvegiya hukumati Rossiya elchixonasining 15 nafar xodimini chiqarib yuborgan edi. Oslo ularni “diplomat maqomiga to‘g‘ri kelmaydigan faoliyat bilan shug‘ullanuvchi” razvedkachilar deb atagan. Moskva bu harakatlarni “dushmanlik harakati” deb hisobladi va o‘n nafar norvegiyalik diplomatni persona non grata deb e’lon qildi. Rossiya Tashqi ishlar vazirligi boshqa javob choralarini ham istisno qilmadi.
Izoh (0)